Skanska og Andritz skal stå for utbygginga av nye Øksenelvane kraftverk

Prosjektet, som fekk grønt lys frå NVE tidlegare i haust, skrir fram og no er det teikna avtaler med dei største leverandørane. Skanska skal stå for bygningsteknisk arbeid medan Andritz skal levere turbinar, generatorar og kontrollanlegg.

- Vi har lang erfaring frå tradisjonelle vasskraftutbyggingar og vi er glade for å kunne bidra inn i endå eit prosjekt som sikrar betre utnytting av kjelder til fornybar energi. Vi har samarbeidd godt med SFE i tidlegare prosjekt og ser fram til å kome i gang med byggearbeida på nyåret, fortel Anders Geirstad, konserndirektør for Skanska si anleggsverksemd.

Det skal byggast nytt inntak i Store Øksendalsvatn og 2,2 km med ny vassveg i tillegg til avløps- og tilkomsttunnellar. Kraftstasjonen vil ha to aggregat på 55 MW kvar, som skal ligge 500 meter inne i fjellet. Fallhøgda frå magasin til kraftstasjon er på 390 meter, og avløpet går rett til Nordfjorden.

SFE sine fagfolk har bidrege i alle fasar av planlegging og prosjektering av det nye kraftverket, og vil sjølv vere byggherre under anleggsfasen.

Lokal bruk av steinmasse

Tore Feten er prosjektleiar i det store utbyggingsprosjektet, og han gler seg til å setje i gang med utbygginga når våren kjem.

Det blir om lag 220 000 m3 med steinmasse frå prosjektet og det har vore stor interesse for desse massane.

- Vi gjer no avtalar med ulike aktørar om bruk av masse i frå kraftutbygginga slik at det blir brukt i tiltak med stor samfunnsnytte. I tillegg kjem vi til å nytte noko sjølv som til dømes til utbedring av vegen mellom Åskåra og Øksenelvane, utanfor den nye kraftstasjonen og til å fornye og utvide friluftsområdet i Lunden i nærleiken av kraftstasjonen. Dette er eit område som i dag blir brukt av lokalbefolkninga og no ønskjer vi å legge området endå betre til rette for bruk.

Av dei største i Noreg

Øksenelvane kraftverk var av dei første store utbyggingane i Sogn og Fjordane for meir enn 70 år tilbake, og no blir Nye Øksenelvane kraftstasjon eit av dei største under bygging i dag. Etter sju tiår i drift, har stasjonen omfattande rehabiliteringsbehov, mellom anna på grunn av skadar i betongen. Planen til SFE er difor å erstatte eksisterande kraftstasjon med ein ny stasjon rett ved sida av den gamle.

- På den måten unngår vi å måtte stanse straumproduksjonen i utbyggingsfasen, seier Feten.

Den nye stasjonen vil gje både 21 GWh meir straumproduksjon og nær firedobla effekt, som betyr at kraftverket er rusta for å levere energien når marknaden treng det, seier Feten.

- Eksisterande reguleringar i vassdraget saman med større slukeevne i kraftstasjonen, og ny og større trykktunnel gjer at det nye kraftverket kan produsere meir og kjappare. Framtidas kraftmarknad med stadig meir uregulerbar kraft vil trenge slike store, fleksible “batteri” som det vassmagasina i Øksenelvane representerer, seier prosjektleiaren. Han legg til at denne utbygginga ikkje medfører store naturinngrep.

- Dette er eit område som allereie er bygd ut, og vi har allereie dei tilkomstvegane vi treng opp til magasina. Det meste av arbeidet vil foregå inne i fjellet. Kraftverket har avløp rett i sjø og vil soleis ikkje påverke fiskebestandar i elv nedstraums.

Den nye kraftstasjonen skal stå klar til produksjon i 2028.

På biletet «signering»: Bjarte Lofsnes Hauge (SFE), Kjetil Toverud (Andritz), Mads Aniksdal (Skanska), Knut Arild Flatjord (SFE) og Tore Feten (SFE).

Kontakt: Knut Arild Flatjord: Tlf 453 91 436